VPROVE 朴寶劍水凝膠面膜 (HK$198/10片)
2018-08-29    by 暗瘡女孩 Happy


面膜密度好高,幾乎唔透氣,造成真空狀態,可以完全貼喺臉上,點喐都唔跌唔移位。睇下小妹眉毛同額頭嘅毛髮,壓扁哂(。・ω・。)。神奇嘅係,皮膚並無抖唔到氣嘅感覺啵。

試哂咁多款之後,小妹覺得金縷梅水面膜最有驚喜。金縷梅本身有鎮靜清涼功效,非常適合敏感皮膚。話說有一晚,小妹畀隻蚊針咗成晚,瞓醒之後個鼻又紅又痕,面頰有蚊赧(>_<)。敷上一陣,就feel到涼浸浸好舒服;敷完10分鐘,已經唔再痕癢,皮膚褪咗紅,蚊赧消咗腫。

蘆薈面膜作用係深度持久保濕,特別適合乾性皮膚。小妹認為佢的確係5款之中最保濕嘅,可惜香料味重,又唔似蘆薈味,即使皮膚唔敏感,嗅覺都有機會敏感⋯⋯

茉莉花面膜可締造輕透和亮白肌膚,同時帶來優雅的香味——但似乎只可為健康皮膚錦上添花。近來小妹皮膚經常乾到痕,敷咗佢反而越來越痕,一啲都唔保濕,第二朝起身繼續痕( ̄◇ ̄;)。

迷迭香面膜聲稱可使皮膚充滿活力、健康潤澤、光彩照人。小妹係喺敷完茉莉花第二朝繼續乾到痕嘅時候使用,敷完無錯係即時舒緩咗,不過3小時後化妝一樣kick粉⋯⋯

過咗幾日,小妹等皮膚無咁乾之後,再試埋最後一款薰衣草面膜。佢嘅香味最清淡自然,敷嗰陣幾舒服,可惜未能舒緩鼻頭嘅乾性痕癢,都係要靠重點搽保濕面霜。

總括而言,VPROVE朴寶劍水凝膠面膜香料味偏濃,貼面透氣卻保濕效果一般,一盒HK$198太貴——如果只係金縷梅水面膜就好值!大家不妨散買幾片看門口,蚊叮蟲咬後急救真心正( ´ ▽ ` )ノ!




最新美容日記

THE LATEST BEAUTY DIARY


© 2018 BEAUBEE Creative Agency